By Zagazola Makama
Shahararren shugaban ‘yan fashin nan Ado Aleiro ya tsallake rijiya da baya a wani hari da sojojin Najeriya na Operation Fansan Yanma suka kai musu a dajin Danjibga dake dajin Munhaye dake karamar hukumar Tsafe ta kudancin jihar Zamfara.
Majiyoyin leken asiri sun shaidawa Zagazola Makama cewa, farmakin da sojojin suka kai kan Aleiro ne da wasu makarrabansa, wadanda ke da alhakin kai hare-hare da garkuwa da mutane da kuma kashe-kashe a fadin yankin.
Majiyar ta ce sojojin sun kaddamar da farmakin hadin gwiwa a kan maboyar, inda suka yi sanadin jikkatar ‘yan bindigar. Sai dai rahotanni sun ce Aleiro ya kaucewa kama shi a lokacin farmakin. Majiyar ta bayyana cewa, farmakin ya yi wa ‘yan fashin mummunar rauni, amma abin takaici, Ado Aleiro ya yi nasarar tserewa, inda ya kara da cewa ana ci gaba da kokarin gano shi. Aleiro, babban mai laifi, ya kasance jigo a rikicin ‘yan fashi da ya addabi Zamfara da jihohin da ke makwabtaka da ita.
Ana zarginsa da kitsa hare-hare da dama da suka hada da na al'umma, matafiya, da jami'an tsaro. Jami’an tsaro na musamman sun zafafa kai hare-hare a jihohin Zamfara, Sokoto, Kebbi da Katsina, musamman a cikin dazuzzuka da maboyar da aka sani da kungiyoyin ‘yan fashi da makami, a kokarinsu na wargaza hanyoyin sadarwar su da kuma dawo da zaman lafiya a yankin Arewa maso Yamma.